Халықаралық Алматы әуежайында клиенттердің саны артып жатыр

2008 жылғы 20 маусым
Жеке ақпарат

Халықаралық Алматы әуежайы 2008 ж. 17 маусымы мен 19 маусымы аралығында Шанхай қаласында өткен «Air Cargo China» көрмесіне қатысты. Бұл көрмеде әуежайлардан өзге ірі карго тасымалдаушылар, сонымен қатар логистикалық және экспедиторлық компаниялар таныстырылды.

Алматы әуежайы көрмеге қатысушыларды әуе жолдары торабы ретінде Азия-Еуропа-Азия бағытында негізгі жүктер мен жолаушылар легін тартуға бағытталған халықаралық көлік-дистрибьюторлық тораптың мүмкіндігін көрсететін стендпен таныстырды.

Халықаралық Алматы әуежайы әуе жолдары торабы ретінде одан әрі даму үшін төмендегі бірнеше басымдыққа ие:

• Алматының қолайлы географиялық жағдайы;

• әуе кемелерінің барлық түріне қызмет көрсетуге арналған қазіргі заманға сай жабдықталған техникалық база, пайдаланылатын ӘК көптеген түрлеріне әуе жолы мен базалық техникалық қызмет түрлерін ұсыну, сонымен қатар тиісті сертификатқа ие білікті маман;

• жүкті сақтауға, ресімдеуге және тасымалдауға арналған қазіргі заманға сай жабдықтар.

Алматы әуежайының басшылық өкілдері көрмеге қатысушы авиатасымалдаушылардың әлуетті клиенттерімен, атап айтқанда: Air Atlanta Icelandic, Air Bridge Cargo,  Cargoitalia,  Ethiopian Airlines,  Emirates Sky Cargo,  Jade Cargo International  Southern Air Inc.,  Sino First International Holdings Ltd.,  Thai Airways International , World Airways Cargo келіссөздер жүргізді. Олардың бәрі де Халықаралық Алматы әуежайы арқылы ұшу мүмкіндігіне қызығушылық танытты.

Әлемдік жетекші авиатасымалдаушылардың арасында Халықаралық Алматы әуежайының беделі ұдайы өсуде.  Үстіміздегі жылы Алматы әуежайында көптеген жаңа жолаушылар мен жүк рейстері ашылды.

Осы жылдың сәуірінде латвиялық "Air Baltic" авиакомпаниясы Алматыдан Ригаға дейін араға қонбай ұшатын  рейсін ашты.

26 сәуірден бастап Алматыдан Киев қаласына украиндық "Aerosvit" авиакомпаниясының рейсі ұша бастады.

Бірінші мамырда Чехтың "Czech Airlines" ұлттық әуежолы Алматы-Прага-Алматы бағыты бойынша араға қонбай тіке ұшатын алғашқы жолаушылар рейсін орындады.

Осы жылы Алматыдан Сочиға "Аэрофлот" ұшағымен ұшуға болады. Шетелдік авиатасымалдаушылар қазірдің өзінде Алматы қаласы арқылы ұшатын өз рейстерінің санын өсіріп жатыр. Мәселен, "Cargolux"  4 наурыздан бастап жүк рейстерінің санын аптасына  3-тен 5-ке дейін арттырды.

Сонымен, Халықаралық Алматы әуежайы жолаушылар мен жүкті тасымалдау бойынша әуе жолдары торабы ретінде одан әрі дами беретін жарқын болашаққа ие.