Қазақстан мен Түрікменстан әуе қатынасын жандандыруда

26.05.2007
http://www.inform.kz

Алматы қаласында Ашхабат – Алматы бірінші рейсінің ашылуының тұсаукесері болды. Түрікменстаннан ұшып келген алғашқы жолаушыларды күтіп алу салтанатына Көлік және коммуникация вице-министрі Азат Бектұров, сонымен бірге «Алматы халықаралық әуежайы» АҚ басшылары қатысты. Түрікмен делегациясын «Туркменховаёллары» («Түркмен әуе желісі») мемлекеттік ұлттық қызметі бастығының орынбасары Тахир Чарыев бастап келді, деп хабарлайды ҚазАқпарат Көлік және коммуникация министрлігінің баспасөз қызметіне сілтеме жасап.

Екі мемлекет арасындағы осыдан 10 жыл бұрын үзілген әуе қатынасын қайта жандандыруға Түрікменстан жағы ұйытқы болды. Қазақстан мен Түрікменстан арасындағы Әуе қатынасы туралы келісімге сәйкес әуе қатынасын жандандыру туралы өтінім мен негіздеме жасалды. ҚР Көлік және коммуникация министрлігінің азаматтық авиация комитеті құжаттарды және ұшу кестесіне қатысты ұсыныстарды қарастырып, Боинг-737-800 әуе кемесімен аптасына бір рет рейс жасауға келісімін берді. Аталмыш шешім 2007 жылғы мамырдың 17-сінде Алматы қаласында өткен кездесу барысында қабылданған болатын. Кездесуде «Алматы халықаралық әуежайы» АҚ, «Қазаэронавигация» РМК басшылары «Туркменхавойоллары» әуе компаниясының өкілдерімен алдағы уақытта бірлесіп атқаратын шаралардың басын ашып алды.

«Туркменхавойоллары» әуе компаниясы көбіне халықаралық рейстер атқаратын Түрікменстандағы ең ірі тасымалдаушы болып табылады. Компанияның ұшу географиясы айтарлықтай кең: Дубай, Бангкок, Дели, Пекин, Стамбул, Франкфурт, Лондон, міне енді Алматы.

Алматыға тікелей рейс ашылғандықтан Мәскеу арқылы қатынау қажеттігі жойылды. Осының арқасында уақыт та (2 сағат 45 минут болады), қаражат та едәуір қысқарады.