Алматы әуежайының терминалы

Жолаушылар терминалының пайдалануға берілуіне байланысты әуежайдың әуе кемелері мен жолаушыларға қызмет көрсету мүмкіндіктері арта түсті.

Бұл - қазіргі заманға сай инфрақұрылымы бар осыған ұқсас шетелдік ғимараттардан кем түспейтін сәулет құрылысы. Ғимаратта озық ғылыми-техникалық жетістіктер қолданыс тауып,  авиациялық бизнес саласындағы жаңа технологиялар енгізілген.

Терминал мен төртдеңгейлі автотұрақ арасын галереялық көпір жалғастырып жатыр. Ол көпір арқылы отырғызу блогына дейін барып, жүкті түсіріп, содан кейін көлікті тұраққа қалдырып, әрі қарай жаяу жүргіншілер жолымен ұшаққа өтуге болады. Ірі ұшақтарға автосаты берілмейді. Ол үшін жолаушыларды бортқа жеткізетін төрт телескоптық саты қарастырылған.

Ерекше жоба бойынша салынған жаңа терминал сағатына 1000 жолаушыға дейін қызмет көрсету мүмкіндігіне ие. Әуежайдың мұндай мүмкіндігі Алматыға ұшып келетін және ұшып кететін жолаушылармен қатар транзиттік рейс жолаушыларына қызмет көрсету деңгейін арттырып отыр.